打針與否，家長各有自己嘅決定，但當真係要打嘅時候，小朋友可能會反應好大，喊足全程，甚至大吵大鬧。家長一方面心痛小朋友，另一方面亦可能感到不知所措，怕麻煩到其他人🤯
小朋友怕打針嘅原因有好多，除咗怕針刺入皮膚嗰一刻嘅痛楚，亦會因為好多嘅「未知數」，以及感統相關嘅問題，令焦慮情緒不斷累積，導致情緒失控。
⭐要令打針嘅過程更順利，家長可以從幾方面入手：
1. 調節呼吸🧘♂️
我哋緊張嘅時候，呼吸會加快及變淺，嚴重嘅話更可能會有呼吸困難嘅感覺，呢個感覺係惡性循環，呼吸愈困難就會愈緊張。相反，如果我哋能夠調節呼吸，係可以改變身體嘅反應，緩和心跳，以及減低緊張情況。可以試試「吸兩秒，呼六秒」呼吸法，能夠幫助刺激身體嘅副交感神經，令我哋平靜落黎。
2. 台上一分鐘，台下十年功🏋
事前準備係至關重要，家長可以事先同小朋友預告整個打針流程，並且做角色扮演。家長扮演護士，幫小朋友拉高衫袖，用酒精紙抺打針位置，再用牙簽模擬打針輕輕咭落皮膚表面。反覆練習後，小朋友就能夠有充足心理準備，知道打針時會發生嘅事，減少因「未知」引起嘅焦慮。
3. 倒數「3,2,1」🕰
打針最驚嘅一刻，往往係護士施針之前，因為唔知幾時會真係咭落黎。家長可以在旁陪伴小朋友，同護士一齊倒數，減少「未知數」，令小朋友可以做好心理準備。
4. 深層按壓💆♀️
準備打針嘅時候，可以試試用緩慢節奏以及穩定嘅力度，幫小朋友按摩膊頭、手肘關節。同調節呼吸嘅原理一樣，按壓能夠令我哋感到平靜放鬆。
5. 家長自身狀態😤
冇錯，要令小朋友冷靜落黎，第一步要調節好自己嘅情緒先。家長見倒小朋友情緒失控、吵吵鬧鬧，加上旁人嘅目光，難免會感到焦急。小朋友同家長相處，同任何人一樣，都係會互相投射情緒。例如當一個人感到失落，旁人會因同理心而吸收到部分失落嘅情緒，焦急情緒亦一樣，如果家長感到焦急，小朋友會吸收到呢個情緒，令佢更難冷靜落黎。所以，要調節小朋友嘅情緒，家長首先要處理咗自己嘅狀態。家長可嘗試以上嘅呼吸法同按壓法，冷靜下來後，小朋友亦會有同樣感受。
Facebook: www.facebook.com/swingsensoryhk/
Instagram: www.instagram.com/swingsensory/
（按此睇下篇）
其他好文推介：
Comments