大部分人都有經歷過唔同程度嘅暈浪反應🤮（頭暈、眼花、噁心⋯⋯），每人嘅敏感程度都唔一樣，但原來喺某啲情況底下，會更容易引起暈浪反應！
暈浪嘅其中一個成因，喺我哋理解身體位置時，接收咗衝突嘅感官訊息。原來有兩個感官系統（前庭覺&視覺），持續咁偵測住身體嘅位置同埋移動🤸。
👂前庭覺 - 接受器位於內耳，能夠偵測頭部唔同方向嘅旋轉，以及水平/垂直嘅移動，佢能夠幫助身體保持平衡、了解身體喺空間入面嘅位置、以及話俾我哋知身體喺咪移動緊。
👀視覺 - 大家都比較熟悉，但原來除咗接收環境入面嘅光線同顏色，腦部亦會處理呢啲視覺資訊，去幫助我哋判斷身體嘅位置、以及理解身體嘅動向（🚶向前行嘅時侯，會見倒環境物件向後郁）。
🤝呢兩個感官系統互相合作，喺腦部整合兩邊感官嘅資訊，理解身體嘅移動及位置，嘗試得出同一個結論。但係，當兩邊感官系統接收嘅訊息唔一致，腦部唔能夠理解呢個身體動向，判斷為冇可能發生，腦部就會發出暈浪嘅警號🥴，令我哋感到頭暈、噁心。呢個反應有科學實證，並稱為感官衝突理論。
🚍🛥️因感官衝突而引起暈浪反應嘅情況，喺搭車搭船嘅時候好容易發生。例如：📱搭車時玩手機，前庭覺感應到身體隨住車輛向前移動。但係，因為望實部手機，視覺見倒嘅畫面無郁動，佢話俾腦部聽，身體並沒有移動。當前庭覺話有郁，視覺就話冇郁，兩邊意見不合，就喺腦部打交，令我哋頭暈作嘔。所以，搭車時玩手機，喺比較容易引致暈浪㗎！
🖲️🕶️另一個常見嘅感官衝突情況喺玩VR（虛擬實境）遊戲。呢個同搭車玩手機剛剛相反，前庭覺會偵測到身體沒有移動，或只有小幅度嘅動作。但係，視覺畫面就可能有高速前進、翻天覆地嘅移動。所以，好多人玩VR一段時間後，都會有頭暈作嘔嘅情況，同暈浪喺十分之相似。
🌟搭車時要舒緩暈浪反應，有幾個方法。第一，可以盡量坐窗邊位置，望遠嘅風景，令視覺系統見到景色動向，知道身體正在向前移動。第二，身體坐向盡量同車輛前進方向一致，避免坐倒後嘅座位，因為身體較習慣向前移動，能減低感官訊息誤判嘅機會。第三，搭車時避免長時間玩手機或睇書，每隔一段時間都要望望窗外遠景。第四，如果唔想望風景，可以合埋眼休息，咁樣可以阻隔視覺訊息🫣，避免接收倒衝突嘅感官訊息。
其他好文推介：
巴士瞓覺團？解構巴士火車好瞓原因
感覺訊息處理？大人細路都要知
小朋友冇時停？利用感統工具穩定情緒！
Comments